मन्थली–खुर्काेट सडक मर्मतका लागि १८ करोड बजेट व्यवस्था भएको छ : राज्यमन्त्री तामाङ

रामेछाप । सङ्घीय सरकारका ऊर्जा, जलस्रोत तथा सिँचाइ राज्यमन्त्री पूर्णबहादुर तामाङ(कान्छारामले) रामेछापको मन्थली–खुर्काेट सडक मर्मतका लागि १८ करोड रुपैयाँ बजेटको व्यवस्था भएको बताउनुभएको छ । आइतबार रामेछापको मन्थली नगरपालिकाको १० औँ नगर स्थापना दिवस समारोहमा बोल्दै उहाँले यस्तो बताउनुभएको हो ।

मन्थली–खुर्काेट सडक रामेछाप सदरमुकाम मन्थलीबाट छोटो दुरीमा राजधानी काठमाडौँ पुगिने राष्ट्रिय राजमार्ग बिपी राजमार्ग जोड्ने सडक हो । यो सडक गत असोज १०, ११ र १२ गतेको अविरल वर्षासँगैको बाढी पहिरोले विभिन्न ठाउँमा क्षति गरेको छ । यो सडक अन्तरगत रामेछाप र सिन्धुली जोडिने सुनकोशीमा रहेको पक्की पुल पनि सुनकोशीमा आएको बाढीले बगाएको थियो ।

अहिले सो पुल बेलिबृज जडान गरी सञ्चालन गरिएको छ । बाढी पहिरोले क्षति गरेको रामेछापको मन्थली नगरपालिका क्षेत्रमा पर्ने मन्थली–खुर्काेट सडक मर्मत सम्भारका लागि १८ करोड रुपैयाँ बजेट व्यवस्था भएको राज्यमन्त्री तामाङको भनाइ छ । अबको एक महिनाभित्र टेन्डर गरी सडक मर्मतको काम सुरु हुने उहाँको भनाइ छ ।
उहाँले भन्नुभयो “बाढी पहिरोले क्षति गरेको मन्थली–खुर्काेट सडक निर्माणका लागि सङ्घीय सरकारबाट १८ करोड रुपैयाँ बजेट व्यवस्था भएको खबर आएको छ । अबको एक डेढ महिना भित्र सो बजेटबाट टेन्डर भएर काम सुरु हुन्छ ।”

आफ्नो अर्काको नभनी रामेछाप जिल्लाको विकासका लागि आफू लागि पर्ने उहाँले बताउनुभयो । जिल्लामा रहेका दुई वटा नगरपालिका र ६ वटा गाउँपालिकाको ६४ वटै वडाको विकासका लागि आफू लागि परेको उहाँले बताउनुभयो । उहाँले अझै पनि मन्त्री हुनुवित्तिकै मागे जति बजेटको व्यवस्था हुन्छ भन्ने मानसिकता रहेकाले यस्तो मानसिकताबाट स्थानीय सरकार लगायतका निकाय मुक्त हुनुपर्ने बताउनुभयो ।

कार्यक्रममा बागमती प्रदेश सांसद एवं प्रदेश पर्यटन तथा वातावरण समिति सभापति आनन्द श्रेष्ठ स्थानीय सरकारको मूल मर्म अनुसार अहिलेको संरचनाहरू ठुलो पो भयो कि? भन्ने विषयमा छलफल चल्न थालेको बताउनुभयो । पालिकाहरूलाई व्यवस्थित गर्नका ठुला संरचनाहरू निर्माण गरी आर्थिक दायित्व र आन्तरिक आयलाई वृद्धि गर्ने बारेमा छलफल भइरहेको उहाँले बताउनुभयो । अब स्थानीय स्तरमा विकासको मोडेल परिवर्तन गर्न आवश्यक रहेको पनि उहाँले बताउनुभयो ।