सुनकोशीमा मोटरसाईकल खस्दा बेपत्ता दुई युवक सम्पर्कमा आए

सिन्धुली । सिन्धुलीको सुनकोशी नदीमा मोटरसाईकल खस्दा बेपत्ता भएको दुई युवा सम्पर्कमा आएका छन् ।

सर्लाहीको बरहथवा नगरपालिका वडा नम्बर–७ घर भएका मोटरसाईकल चालक राजाबाबु यादव र सोही स्थानका अर्का युवा आशिष मण्डल सम्पर्कमा आएका हुन् ।

मोटरसाईकल दुर्घटना भएपछि उनीहरु अर्काे सावरी साधनमा चढेर गएराती नै काठमाडौं गएको प्रहरीले जनाएको छ । यादव र मण्डल सामान्य घाईते मात्रै भएका र उपचार भईरहेको सिन्धुलीका इन्सेपेक्टर सुनिल चौरासियाले जानकारी दिनुभयो ।

बीपी राजमार्गमा पर्ने सुनकोशी गाउँपालिका–७ स्थित सडकबाट ज १० प २६०४ नम्बरको मोटरसाईकल सुनकोशी नदीमा खसेको अवस्थामा प्रहरीले फेला पारेको थियो । सडकबाट करिब ३५ मिटर तल नदी मोटरसाईकल खसेको थियो ।