मन्थलीमा दुई वटा मोटरसाइकल ठोक्किँदा पत्रकार महासङ्घका अध्यक्ष र उद्योग वाणिज्य सङ्घका सचिव घाइते

रामेछाप । रामेछाप सदरमुकाम मन्थलीमा दुई वटा मोटरसाइकल एक आपसमा ठोक्किँदा पत्रकार महासङ्घ रामेछापका अध्यक्ष बद्री नयाँघरे र रामेछाप उद्योग वाणिज्य सङ्घका सचिव यज्ञ सुवेदी घाइते भएका छन् ।

शनिवार साँझ मन्थली देवकोटा चोकबाट जिल्ला प्रहरी कार्यालय हुँदै बसपार्क निस्कने सडक खण्डमा प्रहरी कार्यालय तर्फबाट बसपार्क तर्फ गइरहेको बा ८९ प ८८९१ नम्बरको मोटरसाइकल र हाटे चौरबाट देवकोटा चोक तर्फ आउँदै गरेको बा ९४ प ११५८ नम्बरको मोटरसाइकल मन्थली नगर कार्यपालिकाको कार्यालयबाट सिधा तल एक आपसमा ठोक्किएको हो ।

दुई मोटरसाइकल ठोक्किँदा बा ९४ प ११५८ का चालक रामेछाप उद्योग वाणिज्य सङ्घका सचिव सुवेदी र पछाडि बसेका पत्रकार महासङ्घ रामेछापका अध्यक्ष नयाँघरे घाइते भएका हुन् । अर्का मोटरसाइकल चालक भने सकुशल छन् । उनी जिल्ला प्रहरी कार्यालय कार्यरत रहेको बताइएको छ ।
दुर्घटनामा घाइते भएका दुवै जनाको अहिले मन्थली स्थित रामेछाप सामुदायिक अस्पतालमा उपचार भइरहेको छ । रामेछाप उद्योग वाणिज्य सङ्घका सचिव सुवेदीको नाक, कुम र हातमा चोट लागेको छ भने पत्रकार महासङ्घ रामेछापका अध्यक्ष नयाँघरेको हाट, खुट्टा, टाउको लगायतका ठाउँमा ठोक्किएको बताइएको छ ।