उमाकुण्ड गाउँपालिका भित्रका माध्यमिक विद्यालयमा वर्षे बिदामा कम्प्युटर कक्षा

रामेछाप । रामेछापको उमाकुण्ड गाउँपालिकामा रहेका माध्यमिक विद्यालयहरूमा वर्षे बिदाको समयमा पनि कम्प्युटर कक्षा सञ्चालन भइरहेको छ ।

गाउँपालिकामा रहेका ७ वटा माध्यमिक विद्यालयमा गत असार ३० गतेदेखि दैनिक तीन÷तीन वटा कम्प्युटर कक्षा सञ्चालन भइरहेको गाउँपालिकाले जनाएको छ ।

७ वटा माध्यमिक विद्यालयमा अध्ययनरत कक्षा ८ देखि कक्षा १२ सम्मका विद्यार्थीहरूलाई वर्षे बिदाको समयमा २ घण्टा समयको एउटा कक्षा रहने गरी दैनिक तीन वटा कम्प्युटर कक्षा सञ्चालन भइरहेको गाउँपालिकाका शिक्षा अधिकृत ङावा शेर्पाले बताउनुभयो ।

उहाँले भन्नुभयो उमाकुण्ड गाउँपालिकामा रहेका माध्यमिक विद्यालयमा अध्ययनरत कक्षा ८ देखि कक्षा १२ सम्मका विद्यार्थीहरूलाई वर्षे बिदाको समयमा लक्षित गरी १५ दिने कम्प्युटर (अफिस प्याकेज) कक्षा सञ्चालन भइरहेको छ । अहिले ७ वटा माविमा दुई÷दुई घण्टा समयको तीन÷तीन वटा कम्प्युटर कक्षा सञ्चालन भइरहेका छन् ।’’

विद्यालय वर्षे बिदा भएपछि गत असार ३० गतेबाट सुरु भएको कम्प्युटर कक्षा यही साउन १२ गतेसम्म सञ्चालन हुने शिक्षा अधिकृत शेर्पाले बताउनुभयो । एउटा माविमा २० वटा मात्रै कम्प्युटर रहेकाले २० जना विद्यार्थीको एउटा समुह बनाएर सबै विद्यालयमा दैनिक प्रति कक्षा २ घण्टा समयका तीन वटा कक्षा सञ्चालन गरिएको उहाँले बताउनुभयो । गाउँपालिकाले विद्यालयले कम्प्युटर कक्षा सञ्चालन गरे पश्चात् विद्यार्थीको हाजिरी र शिक्षकको हाजिरी सहितको कागजात संलग्न राखी भुक्तानीका लागि गाउँपालिकामा पेस गर्न पनि आग्रह गरेको छ ।