८ बर्ष पछि महानायक राजेश हमालको कमब्याक फिल्मको नाम– ’नरसिंहाः अवतार’

काठमाडौं, साउन २४, अभिनेता राजेश हमालले ८ वर्षपछि कमब्याक गर्न लागेको फिल्मको नाम ’नरसिंहाः अवतार’ घोषणा गरिएको छ।

निर्माणपक्षले बिहीबार थिम पोस्टर सार्वजनिक गर्दै फिल्मको निर्माण घोषणा गरेको हो। यो फिल्मलाई दिवाकर भट्टराईले निर्देशन गर्न लागेका छन्।

सार्वजनिक पोस्टरमा रातो र निलो रङ प्रयोग छ। यसले फिल्मको कथा युद्ध र शान्तिको हुने संकेत गरेको छ। साथै पोस्टरमा नरसिंहाको उग्र अवतार छ। यो फिल्म एक्सप्रधान बनाउने तयारी छ।

राजेश हमालले फिल्ममा काम नगरेको ८ वर्षभन्दा धेरै भइसकेकाले यो फिल्म उनीसँगै दर्शक दुवैका लागि विशेष हुने पक्का छ। उनले गत आइतबार मात्रै यो फिल्म साइन गरेका थिए।
क्रिएटिभ सिने आर्टको प्रस्तुति रहने फिल्मको जानरा खुलाइए पनि निर्माणपक्षले कथाबारे केही जानकारी गराएको छैन। फिल्मको अभिनेत्री, अन्य कलाकार र निर्माताबारे पनि जानकारी दिइएको छैन।
फिल्मको लगानी भने तीन करोडभन्दा माथि हुने बताइएको छ। यो फिल्ममा राजेशलाई नयाँ लुकमा ल्याउने तयारी छ। उनका लागि यो फिल्म करिअरको पावरफूल दोस्रो इनिङ हुनसक्ने लेखकसमेत रहेका निर्देशक दिवाकरले बताएका छन्।

आफूप्रतिको विश्वासलाई एउटा उचाइ दिने पनि दिवाकरले बताए। फिल्मको छायांकन भदौदेखि सुरू गर्ने तयारी छ।