लेकखर्क पहिरो पीडित बारे निर्णय गर्न विपद् व्यवस्थापन समितिको बैठक बस्दै

रामेछाप। रामेछापको दोरम्बा शैलुङ गाउँपालिका–३ टोकरपुर स्थित लेकखर्कका पहिरो पीडितका बारेमा आवश्यक निर्णय लिन सोमबार जिल्ला विपद् व्यवस्थापन समितिको बैठक बस्दै छ ।

पहिरो पीडितलाई राज्यले दिने राहत रकम प्रदान गर्ने, जोखिममा रहेका परिवारको व्यवस्थापन लगायतका बारेमा आवश्यक निर्णय लिन सोमबार बिहान ८ बजे जिल्ला विपद् व्यवस्थापन समितिको बैठक राखिएको प्रमुख जिल्ला अधिकारी एवं विपद् व्यवस्थापन समिति रामेछापकी संयोजक अनिता निरौलाले बताउनुभयो ।

उहाँले भन्नुभयो “ पहिरो पीडित बारे आवश्यक निर्णय लिन बिहान ८ बजे विपद् व्यवस्थापन समितिको बैठक राखिएको छ । राहत दिने बारे दोरम्बा शैलुङ गाउँपालिकाको आइतबार साँझ नै बैठक बसिसकेको भन्ने खबर आएको छ । सङ्घीय सरकार र प्रदेश सरकारबाट पीडितले पाउने राहत रकम मापदण्ड अनुसार हामी मृतकको परिवारलाई उपलब्ध गराउँछौँ।”

मुख्य कुरा जोखिममा रहेका बस्तीका मानिसहरूको सुरक्षित व्यवस्थापन रहेको उहाँले बताउनुभयो । अहिले जोखिममा रहेका बस्तीका मानिसहरूलाई सुरक्षित ठाउँमा सारिएको भए पनि पशु चौपाया लगायत अन्य कुराहरूको पनि तत्कालै व्यवस्थापन गर्न आवश्यक देखिएको उहाँले बताउनुभयो । शनिवार राति करिब ११ः४५ बजेको समयमा दोरम्बा शैलुङ गाउँपालिका–३ टोकरपुर स्थित लेकखर्कमा पहिरोले बस्ती बगाउँदा ६ जनाको ज्यान गएको छ । ४ जना अझै बेपत्ता छन् । एक जनालाई घाइते अवस्थामा उद्धार गरिएको छ ।