अखिल क्रान्तिकारी रामेछापको अध्यक्षमा रोशन कार्की निर्वाचित

रामेछाप । अखिल नेपाल राष्ट्रिय स्वतन्त्र विद्यार्थी युनियन(क्रान्तिकारी) रामेछापको अध्यक्षमा रोशन कार्की निर्वाचित भएका छन् । शनिवार सदरमुकाम मन्थलीमा भएको अखिल(क्रान्तिकारी)को १७ औँ जिल्ला सम्मेलनबाट कार्की अध्यक्षमा निर्वाचित भएका हुन् ।

अध्यक्षका अर्का उम्मेदवार प्रज्वल श्रेष्ठलाई १८ मतले हराउँदै कार्की अध्यक्षमा निर्वाचित भएका हुन् । कार्कीले ५७ मत पाउँदा श्रेष्ठले जम्मा ३९ मत मात्रै पाएका छन् । त्यसै गरी दुई उपाध्यक्षमा ४९ मत प्राप्त गरी अनोज भुजेल र ४४ मत प्राप्त गरी नवीन कार्की निर्वाचित हुँदा ३३ मत ल्याउँदै सिंहराज योञ्जन र ३६ मत ल्याउँदै दीपेन्द्र चौहान पराजित भएका छन् ।

त्यसै गरी छात्रा उपाध्यक्षमा रजिना घिसिङलाई १३ मतले हराउँदै सम्पदा श्रेष्ठ निर्वाचित भएकी छिन् । श्रेष्ठले ५० मत प्राप्त गर्दा घिसिङले जम्मा ३७ मत मात्रै प्राप्त गरिन् ।

सचिवमा उकास लामालाई १३ मतले हराउँदै विशाल खत्री  निर्वाचित भएका छन् । खत्रीले ५५ मत ल्याउँदा लामाले ४२ मत प्राप्त  गरे । छात्र सह–सचिवहरूमा अजय श्रेष्ठ र जोनसोन कार्की सर्वसम्मत चयन हुँदा छात्रा सहसचिवमा भने निर्वाचन भएको थियो । निरुता योञ्जनलाई २४ मतले हराउँदै मनीषा माझी छात्रा सहसचिवमा निर्वाचित भएकी छिन् । माझीलाई ५८ मत प्राप्त हुँदा योञ्जनलाई जम्मा ३४ मत प्राप्त भयो । कोषाध्यक्षमा कमला योञ्जनलाई २५ मतले हराउँदै राजकुमार श्रेष्ठ निर्वाचित भएका छन् । श्रेष्ठले ६० मत पाउँदा योञ्जनले ३५ मत पाएका छन् ।